Dictada occitana del País d’ORLHAC

Aurillac / Orlhac, Mur de Barrez / Lo Mur, Montsalvy / Montsalvi, Pléaux / Pleus, Saint-Martin Valmeroux / Sant Martin Grand, La Roquebrou / La Ròca Bro, Raulhac, Vic-sur-Cère / Vic en Carladés

"La mosca maire", raconte tirat del libre Antonin Daval, lo paisanton d’a Badalhac (Ostal del libre 2015)

[…] Quand fasiá pas maissant temps, quand fasiá un temps coma cal, me portavan un uòu, un bocin de fromatge, e un coireton de sopa e lo botelhon – delant i aviá de l'aiga e del vin, èra pichon, teniá a pus près un veire – d'aquel temps…*  mès agara los enfants manjan mai qu'atal : auèi un enfant despartinariá pas sonca amb un uòu. Mès d'aquel temps disián "Ò lo gastat ! A manjat un uòu." Bòn, mès quò èra ben atal, i aviá mai que ieu.**   Mès ieu ère gastat, per çò que aquelses que èran per las montanhas, al Pom del Cantal, èran ben pus malurós que ieu. Ieu ère a l'ostal amb mos parents, mès n'i aviá qu'èran logats, n'i aviá qu'èran partits far pastrons a sèt ans. A sèt ans ! N'i aviá que partián a sèt ans : totses los estius gardavan dels vedèls o de las manas, n'impòrta.***

 

* Fin de la dictada dels debutants (47 mots).
** Fin de la dictada dels mejans (88 mots).
*** Fin de la dictada dels confirmats (158 mots).



Dictada occitana del País de Sant-Flor
(lo 6 de febrièr de 2016)

Tèxte : "Pière lo bèstia", tirat de Cherchapaís, Contes d’Auvernha e de Velai (Edicion IEO Auvernhe, 1979)

Dinc un vialatge de la comuna, i aviá un còp un garçon qu’èra pas bien finàs. Un jorn sa maire l’envòia a Ruena per cercar una gulha per petaçar las chalças de lana. E partiguèt per crompar la gulha.*  En davalant de crompar la gulha, pels chamins, aguèt besonh de cagar. S’arrestèt près d’un palhièr de palha que i aviá aquí, per faire ce que zaviá besonh de faire.**  Planta la gulha aquí pel palhier, e quand aguèt ’chabat de faire sos besonhs, cercava la gulha, mes impossible de trobar la gulha ! Demoliguèt lo palhier : impossible de trobar la gulha ! Partiguèt coma aquò.
– Maire vos portave ben la gulha, mes en chamin ai agut besonh de cagar. Ai pausada la gulha dinc lo palhier, impossible de la trobar après !
– E bogre d’ase ! La podiás pas penjar a la botoneira !
– A ! O farai un alte còp, ma maire, o farai !***

 

* Fin de la dictada dels debutants (39 mots).
** Fin de la dictada dels mejans (68 mots).
*** Fin de la dictada dels confirmats (158 mots).?

?

En poursuivant votre navigation sur ce site, vous devez accepter l’utilisation et l'écriture de Cookies sur votre appareil connecté. Ces Cookies (petits fichiers texte) permettent de suivre votre navigation, actualiser votre panier, vous reconnaitre lors de votre prochaine visite et sécuriser votre connexion. Pour en savoir plus et paramétrer les traceurs: http://www.cnil.fr/vos-obligations/sites-web-cookies-et-autres-traceurs/que-dit-la-loi/

J'accepte