Dictada occitana del país de Sant-Flor – Lo 8 de febrièr de 2014

Tèxte : "L’ivrònha e lo lop" tirat de Pròsas de NORIB - Pierre Biron
Editions Lo Convise, 2013

       Un sabte, lo vassera, un òme qu’aviá beugudas tròpas de mejas veniá da Sant-Flor en trantiolant, fasiá los èsses pel Chamin Farrat – les altes còps, la granda rota s’apelava coma aquò. Mai que foguèsse pete, se sovenguèt que sa femna l’engulava quand aviá tròp beugut*(…) ; avant d’arribar a son ostal, l’idèia li venguèt de se pausar un bocin : quò’s que s’ajacèt e s’endurmiguèt, e la nuèit lo susprenguèt.**

       Vos disi pas quantas oras se rapausèt ; mès coma se trobava bien, l-i sariá damorat enquèra un pauc mai, n’èsse pas sentit quicòm coma lo nas d’un chan que lo tochava per las mans mai pel morre ; quò li faguèt durbir los uèlhs e veguèt que quò z-èra un lop… Boleguèt pas e la laida bèstia lo quita per anar udolar sobre un tèrme pas gaire lònh d’aquí : l’òme comprenguèt que Corta-Aurelha ne’n sonava maites per venir far festa a ses despens.***

* Fin de la dictada dels debutants (42 mots).
** Fin de la dictada dels mejans (72 mots).
*** Fin de la dictada dels confirmats (157 mots).

 


 

Dictada occitana del país d’Orlhac

(Aurillac - Orlhac, Mur de Barrez – Lo Mur, Montsalvy - Montsalvi, Pléaux - Pleus, Saint-Martin Valméroux – Sant Martin Grand, La Roquebrou – La Ròca Bro)

Tèxte de Fèliç Daval, tirat de La legenda del Grand Guindon, paginas 8 a 10
co-edicion Edite-moi ! – IEO Edicions, 2013

[Un troupeau de vaches Salers est entouré de loups cachés dans les fourrés… c'est un taureau qui raconte ses souvenirs.]

Merlet, lo mieu rèirebelet,
Qu’èra un plan polit borret,
Èra al cap del prat tot solet ;
S’amusava a rosegar
Quauquas fuèlhas pel boscalhat.

Entendèt quicòm bolegar.
N’aviá un de cada costat.
Sul pic s’arrestèt de jogar
E prenguèt la peta capbàs.*

Coma d’avanci n’aviá pas,
Los lobatons de lo gafar
Per las cambas e mai pels braçs.
Merlet, pecaire, de gueilar.
Totas las soiras de lo postejar.

La loba mèstra l’aviá ratrapat,
Guela d’un còp de dent,
Al paure adolescent
Voliá copar los rens.**

Lo lobàs prendiá vam ;
Voliá passar davant
Per, entre sos grands cròcs,
Far esclatar lo nas
Del felen de l’auròc.

Mès, ja al fons del prat
S’èran quilhats los caps.
Grand Maurèl aviá entendut,
Èra pas fotrau ni pauruc,
Tot lo tropèl l’aviá segut.

Al son dels bronzes e dels coires atacava,
D’en primièr las banas gròssas per assucar,
Darrièr las banas ponchudas per estripar,
Puèi la joinèssa per trepir e esclafar.***

* Fin de la dictada dels debutants (42 mots).
** Fin de la dictada dels mejans (85 mots).
*** Fin de la dictada dels confirmats (158 mots). 

 

En poursuivant votre navigation sur ce site, vous devez accepter l’utilisation et l'écriture de Cookies sur votre appareil connecté. Ces Cookies (petits fichiers texte) permettent de suivre votre navigation, actualiser votre panier, vous reconnaitre lors de votre prochaine visite et sécuriser votre connexion. Pour en savoir plus et paramétrer les traceurs: http://www.cnil.fr/vos-obligations/sites-web-cookies-et-autres-traceurs/que-dit-la-loi/

J'accepte