Fasem coneissença !

Découvertes occitanes es a l'ora d'ara la soleta librariá especializada en cultura occitana dins la region Auvèrnhe. Cal dire tanben qu'en França, las librariás d'aquela sòrta se comptan pas que suls dets d'una man !

Foguèssetz novici-a o mai assabentat-da, podètz  trobar a cò nòstre çò que vos interessa de la cultura occitana : libres, revistas, CD, DVD mai pichons presents identitaris, que sián en francés, en occitan o bilingüe francés e occitan. 

Coma sèm en Auvernhe, nòstra  laissa "regionala" es plan provesida de çò que tòca lo patrimòni regional, material mai immaterial : patrimòni bastit, arts, tradicions, contes, cosina, istòria e geografia de la region, natura, torisme... lo tot estant una part, plan segur, de l'ensemble cultural occitan. 

Découvertes occitanes, es tanben un luòc d’escambis e d'informacions e que tot lo monde se i pòt venir assabentar sus la cultura occitana e lo patrimòni occitan, siá immaterial siá material, e sus la creacion occitana actuala, coma s'exprima dins lo Cantal, en region Auvernhe e dins Occitània tota.

Venètz nos vistalhar ! Seretz aculhit-da amb plaser, per de libràrias motivadas e competentas, al debàs de l'Ostal del telh, 1 carrièra Jean Moulin  a ORLHAC (Cantal), del diluns al divendres, de 14 oras a 18 oras 30.

Nos podètz veire tanben dins d'unas manifestacions tot lo long de l'annada, que i tenèm un taulièr : quora e endont ? Per o saber, vos cal agachar nòstras actualitats. 

Nòstras competéncias

Logo LIRAdécouvertes occitanes fa partida de l'associacion dels Libraris independents en Region Auvèrnhe (LIRA) e vos convida a legir la Carta d'engatjament e de servicis dels libraris independents qu'aderisson a l'associacion. Per conéisser la carta dels libraris d'Auvèrnhe, clicatz aicí.

 

 Logo oc per l'occitan nivèl 2

 

découvertes occitanes ten tanben lo labèl  "Òc per l'occitan" : poiretz èstre aculhit-da en francés o en occitan, coma volètz. Es pas un exemple, nòstre siti, d'aquel acuèlh bilingüe ?

 

UN istoriC cortet...

 découvertes occitanes es una de las activitats de l'Ostal del libre, associacion 1901 que sa tòca es de promòure e de far connéisser la lenga e la cultura occitanas, especialament per l'edicion e la difusion de produchs culturals occitans (article 2 de sos estatuts).

Nascut en 1988, l'Ostal del libre foguèt a l’origina un dels sectors d’activitat de l'Institut d'Estudis occitans del Cantal : lo de las edicions. Dempuèi 2001, l'Ostal del libre es vengut una associacion 1901 independenta, per sos estatuts e per fonccionar. L’Ostal del libre causiguèt çaquelai de gardar d’unes ligams amb l’Institut d'Estudis Occitans, que n’es aderent.

 

aceptar