Dictada occitana 2020 : lOs tÈxtes pEL Cantal

E SE VOLÈTZ UN DIPLÒMA A VÒSTRE NOM, DOBLIDETZ PAS DE VOS MARCAR a Découvertes occitanes :
passatz a la librariá, o sonatz (04 71 43 33 69) o mandatz un corrièl !


PER ORLHAC, CRANDELAS, SANT-SERNIN, LA RÒCA BROU, MONTSALVI, PLEUS, VIC-EN-CARLADÉS, LO MUR-DE-BARRÉS

Lo Fau, d'après Ivèta Balard, Arbres d'en çò nòstre (p. 29-31, Lo Grelh Roergàs, 2017)

   (…) Es de fau aquel burèu. Lo fau ! Òste magestuós de las nòstras selvas. Amb los autres, roves e garrics, amb los beces, lo fau es l'arbre que se trapa lo mai per las nòstras montanhòtas de Leveson o d'Aubrac.
     Dins una fajada, tot es linde, las èrbas i pòdon pas butar aisidament.* Los rais del solelh i son tamisats, aital se sèrva una ombra espessa, de la prima a la davalada. Aquí, dins aquel ambient, lo temps s'apasima, los bruches s'ensordisson... Las cambas argentadas, longas e primas, se tiban cap al cèl de la vouta folhuda e fosca coma s'ennaussan las colomnas d'una catedrala vertadièira. Airal magic, enfachinaire, convit al reculhiment e a la meditacion.**
     A l'arbre li cal una atmosfèra umida, de nèblas e de tubas. Las calorassas li agradan pas tròp. E mai crente pas la nèu ni mai lo freg de l'ivèrn, las geladas tardivas de la prima li pòdon rabastinar las fuèlhas tendrinèlas. Es pasmens un arbre rustic e vigorós. Se contenta de pauc, en armonia amb lo mond de païsans que visquèron sus aquelas crincas, durs al trabalh, abalits amb d’òli d’endura.***

* Fin de la dictada dels debutants (53 mots)
** Fin de la dictada dels mejans (116 mots)
*** Fin de la dictada dels confirmats (188 mots).

 


PER MASSIAC, RIOM E SANT-FLOR

"Amont al país gençana", J.-M. Maury,  extrach de Flors d’Espinetas (p. 131-132, Edicions La Cabreta, 2011). 

Al mes de Junh quand la gençana
Es a florir per las montanhas
Del Puèg Marin al Suc de Rond
E de la Font-Santa al Limon
Anatz doncas chaminar amont,
Amont dins lo país gençana.

Dejós l'agait estabosit
De la regalécia blava

Que demòra a badar aquí
E dejós l'uèlh atendresit
De las pensadas modèstas
Per li faire la reveréncia
Prèstas a baissar la testa
Corsatge emplenat d'aur dubèrt
Cotilhons verdes naut troçats
La gençana altièra se dreiça.*

Talha prima tèsta quilhada
Reina e fièra dins son pòrt
Apimpada, coronada
Filha de Margòt la reina
Reina aimada dels pastorèls
Pastorèla amada dels reis
Parada de sos joièls d'aur
Dins sa rauba verda rebussada
E amb son bavarèl florit
Mai crane simbòl del país
La gençana del país nòstre
S'apresta a dançar la borrèia
Crana dança del país nòstre.**

Quand a travèrs de las fumadas
Seguida del tropèl dels vedèls
Coa sobre l'eschina dreiçada
Qu'espingan al mièg de las gençanas
Al son d'estiulas e garlandas
La valchèira de Salèrn s'alanda
Quand l'alausa chanta al cial
Que l'aire odora lo mial
Anatz chaminar per las montanhas
Amont dins lo país gençana.***

* Fin de la dictada dels debutants (78 mots)
** Fin de la dictada dels mejans (138 mots)
*** Fin de la dictada dels confirmats (190 mots).



aceptar